ئه‌مڕۆ 25/7 له‌شاری كه‌ركوك پرۆسه‌ی هه‌ڵبژاردنی نه‌قیب و ئه‌ندامانی ئه‌نجومه‌نی سه‌ندیكای پارێزه‌رانی كوردستان به‌ڕێوه‌چوو.

له‌باره‌ی پرۆسه‌كه‌وه‌ بۆكان عه‌بدوڵڵا پارێزه‌ر له‌لقی كه‌ركوك پێی راگه‌یاندین: پرۆسه‌كه‌ به‌شێوه‌یه‌كی یاسایی له‌سه‌عات 9 ی سه‌رله‌به‌یانی ده‌ستی پێكردو تا سه‌عات 5 ی ئێواره‌ به‌رده‌وام بوو.
وتیشی له‌سنوری لقی كه‌ركوكدا 226 پارێزه‌ر مافی به‌شداریكردنیان هه‌بووه‌ كه‌ پێشتر پۆستی نه‌قیب بۆ سه‌ندیكاكه‌ یه‌كلایی بۆته‌وه‌ به‌و پێیه‌ی مونافسی نه‌بووه‌ كه‌ ئه‌ویش (وریا سه‌عدی) یه‌.
بۆكان عه‌بدوڵلا روونیشی كرده‌وه‌ كه‌ پێنج لیست هه‌بووه‌ بۆ ئه‌ندامانی ئه‌نجومه‌نه‌كه‌ خۆیان پاڵاوتووه‌و یه‌كێتیی نیشتمانیی كوردستان و پارتی دیموكراتی كوردستان پێكه‌وه‌ به‌ناوی لیستی ته‌بایی دابه‌زیون.
وتیشی ژماره‌ی ئه‌و ئه‌ندامانه‌ی بۆ ئه‌نجومه‌نی سه‌ندیكاكه‌ دیاریكراون ژماره‌یان 10 ئه‌ندام بوو.
سه‌رچاوه‌یه‌كیش له‌لیژنه‌ی سه‌رپه‌رشتی هه‌ڵبژاردنه‌كه‌ پێی راگه‌یاندین كه‌ له‌ئه‌نجامی پرۆسه‌كه‌دا له‌كه‌ركوك لیستی ته‌بایی سه‌ركه‌وتنی گه‌وره‌ی به‌ده‌ستهێنا و لیستی براوه‌ی هه‌ڵبژاردنه‌كه‌ بووه‌.

F. PUKmedia