له‌ ماوه‌ی (7) ساڵی رابردوودا له‌شاری كه‌ركوك چه‌ندین پۆلیسی هاتوو چۆ به‌هۆی ته‌قینه‌وه‌ و شه‌هید كراون و تا ئێستا موچه‌ی خانه‌نشینیان بۆ نه‌برِاوه‌ته‌وه‌.

نه‌قیب كامران شكور محه‌مه‌د ئه‌فسه‌ری راگه‌یاندن له‌ پۆلیسی هاتوچۆی كه‌ركوك بۆ هه‌واڵ رایگه‌یاند:  "له‌ دوای ساڵی 2003ه‌وه‌ تا ئێستا (12) پۆلیسی هاتوچۆ له‌ شاری كه‌ركوك شه‌هید بوونه‌ "، وتیشی  "ئه‌و شه‌هیدانه‌ هه‌موویانه‌ به‌ هۆی ته‌قینه‌وه‌وه‌ گیانیان له‌ده‌ستداوه‌ و هه‌موویان له‌ ره‌گه‌زی نێرن و ژنیان تێدا نییه‌ "، نه‌قیب كامران شكور محه‌مه‌د ئه‌وه‌شی روونكرده‌وه‌  "شه‌هیده‌كان له‌ هه‌موو نه‌ته‌وه‌كانن له‌ كورد و عه‌ره‌ب و توركمان و مه‌سیحین، پۆسته‌كانیشیان ئه‌فسه‌ر و مفوه‌ز و پۆلیسی ئاسایین،  به‌هۆی ئه‌وه‌ی  مامه‌ڵه‌كانیان ته‌واو نه‌بووه‌ بۆ ئه‌وه‌ی موچه‌ی خانه‌نشینیان بۆ ببرِێته‌وه‌ تا ئێستا ئه‌و شه‌هیدانه‌ موچه‌ی پۆلیسی ئاسایی خۆیان وه‌رده‌گرن و موچه‌ی خانه‌نشینی و شه‌هیدانه‌یان بۆ نه‌برِاوه‌ته‌وه‌ ".

جێی ئاماژه‌یه‌ له‌ ئامارێكی به‌رِێوه‌به‌رایه‌تی پۆلیسی گشتی عێراق له‌ ماوه‌ی ساڵی (2003)ه‌وه‌ تا ساڵی (2006)، ژماره‌ی شه‌هیده‌كانی پۆلیسی هاتووچۆ له‌ عێراقدا (58) پۆلیس بوه‌وه‌ و یه‌كێك له‌و شه‌هیدانه‌ش ژنه‌ و پۆسته‌كانیانیش بریتیه‌ له‌ ئه‌فسه‌ر و مفوه‌ز و پۆلیسی ئاسایی و عه‌ریف.

F. Hawalnews